¿Quen é Creativas Galegas?
Creativas Galegas é unha entidade de economía social, unha Sociedade Cooperativa Galega sen ánimo de lucro.
É unha marca paraugas que reúne, acolle, impulsa e dá visibilidade a profesionais do eido cultural galego: creativos, artesáns, artistas escénicos e selectos produtores, que crean e deseñan en Galicia, produtos e servizos de calidade.
Os seus valores son de axuda e mellora mutua, responsabilidade e corresponsabilidade, igualdade, equidade, solidariedade, honestidade, transparencia, autonomía, autoxestión, responsabilidade e preocupación polas persoas.
¿Cal é a finalidade de Creativas Galegas?
Unirse baixo o amparo dunha única marca, nunha única entidade empresarial, co fin de conseguir logros comúns como:
Poder de negociación grazas a unha negociación colectiva.
Mais visibilidade e tráfico de clientes obxectivos aos nosos espazos de venda pola suma de forzas e recursos de todas as persoas do colectivo.
Competir no mercado co noso produto artesanal fronte ao produto importado.
O Mercado Galego da Creatividade
No número 36 da Rúa da Caldeirería (Santiago de Compostela) atópase dende decembro de 2019 o Mercado Galego da Creatividade, un espazo físico impuslado polo colectivo que reúne ás múltiples propostas de arte, deseño, artesanía, moda, obradoiros e eventos culturais.
O Mercado 2.0
Creativas Galegas e AGRUOSTUDIO únense para o que será o seu novo espazo dixital.
Agora, Creativas Galegas confía en nós no que será o primeiro paso no seu proceso de dixitalización. Un sistema web basado en marketing dixital, comercio electrónico e xestión do colectivo.
O sistema desenvolto está preparado dende o primeiro momento para unha correcta escalabilidade. Sabemos que Creativas Galegas, e as marcas asociadas medrarán con este novo impulso e por iso deixamos unha plataforma aberta a novas integracións e ampliacións.
Para nós este desenvolvemento é moi especial porque somos parte de Creativas Galegas dende o seu comezo como marca asociada. Esta vez fomos os responsables de levar este gran proxecto ao mundo dixital, e con el o produto, a cultura e a creatividade galega..
Creativas Galegas, el gran proyecto.